Priče iz ličkog kraja: Babine zgode – Moreš ić iz Like, ali Lika iz tebe nikad

O, dica, silom prilike sam morala poć iz svoje Like, ali ča mogu. Teško mi je i dan danas bez moga kraja, a ča mislite kako mi je onda tek bilo prije dvadesetak godin kad sam tek došla vamo…

Muke po telefonu

Dogodilo se ovo tamo negdi početkom 90tih(nemojte me točno držat za riječ), ali u vrime kad se na području V.Gorice minjali brojevi telefona. Iako sam morala poć iz Stajnice, al uvik sam bila u kontaktu sa svojimi prijateljicami iz Like.

Zovnem jednu posebno dragu prijateljicu jer mi bilo čudno ča ona mene već dugo ne zove. Ma tek ča se javila čim je čula da sam ja a ona u jetiku:

“O Jelkica moja udobar ti mene nazva! Ja tebe neki dan zvala kad se ono javi neka gospa i kaze: broj koji ste nazvali više se ne koristi, novi broj je…. Ja njoj kažem da malo počeka da uzmem kemijsku. O, Jelka moja,dok ja dojde nazad ona poče po stranjski divanit, a ja niš ča ću jadna ma jedva hrvatski razumim, a kamo li stranjski pa joj poklopi.”

Ajme dica moja, nasmijala sam joj se do suza, ali tako bi i meni bilo isto. Pa jesmo mi stari jadni pri ti novi sprava. Prije toga ničesa ni bilo. Al neka, jopet da ni eto ti telefonov i mobitelov ma ne bi čula svoji prijateljic nikako.

Kuhinja po starinskom uzoru

Evo dojdem k nučici u stan pa mi točno milo i drago kad vidim ča je napravila od svoje kuhinje. Kej da dojdem u svoju kuvarnu. Nema ona namještaj visokog sjaja kej svi vi mladi koji blišći da ne moreš u njega ni gljedat!

Ona je od stariji elementov u kuhinji poskidala par vratašac i metnula firongu kej ča sam ja imala na kredencu. Evo joj radijo stoji na “kutnom ormariću” točnije na štokrlu; lipša krpa visi na električnom šporetu, i dok na hodniku bazdi miris nekakovih prčkarij ča vaj “fin” narod kuva u oni keramički lonci, iz njezinog stana se širi miris zelja i fažola iz padele na rožice.

Držte bar doniklje do starine, nemojte sve baš prepustit modi. Ako ne niš, bar će vašim babam bit drago kej ča je meni.

---

Tekst: po pričanju bake Jelke

Foto: zmlinar photography