MILE RBINA: Gljej parade majmune jedan!

Čera me stara digla rano ujutro. Odma je počela kljet kako sam leventina i niš ne delam i da mi je vrime da se oženim al najprvo da dojdem k pameti. Još je rekla kako sam munjen, a da je i ona munjena jer me ni više tukla pok sam bil mali. Valjda bi danas izrasal u kakovog vridnjaka a ne u zgubidana koji po cele dane tuinja po Brinju a noći provodi u vražji birtija.

Još me glava bolila od onih gemištov od malvazije sinoć, pa sam joj ja rekal kako će od mene ipak bit nešto. I da ću ja u Brinju organizirat gej paradu, a onda ubrat novce od turistov koji to dojdedu vidit.

-Gljej… ča? -upita mater.

-Ni gljej, nego gej. Gej parada. -rečem to onako ispod popluna.

-Kakove bi ti parade sad delal, pa ionako cijeli dan paradiraš po selu od birtije do birtije, medvide jedan, de medvide jedan! -stara je počela lagano kuvat.

-Mama, ma to su ti danas novci, ča nisi vidila na televiziji koliko se u Berlinu skupi ljudi. Ča misliješ koliko oni potrošidu tamo, a koliko zaradi naj ki to organizira? Sad se stara malo zamislila, jer joj je televizija zakon i “ča oni tamo rečedu, to je tako i nikako drukče”. Pa sede na krevet i poče računat bil se tu kako dalo sira prodat, a možda i ka vrića krumpira.

-A jeli, koliko bude ljudi na toj paradi?

-Puno, na iljade. -rečem- I svi ti se onako obučedu, munjeno, kej da su mačkare, ali litnje. Znaš ono kej u Senju? Jer im obično bude vruće.

-Ča je to samo po liti? -Zapita mater, a već u sebi preračunava kako ostavit krumpira do lita, i bil se kako parada mogla odgodit dok se krumpir ne pobere. Misli mater i na kvalitetu, jer ipak domaći lički krumpir je najbolji i ne bi se smilo desit da ki kaže drukče. Tako se kupci vrate i dogodine… Odgovorim ja da to ne mora bit samo po letu, da more i u jesen, proliće…

-Pa ča se uvik obučedu lagano? -Materi još niš ni bilo jasno.

-Pa da. To ti je kod njih normalno. Volidu da im se vide i cice i guzice. Sad sam ja pogljedal ispod popluna da vidim ča će ona reć. A ona gljeda u me izbečeno, jer je ona svake nedilje u crkvi, i kad na televizoru vidije film u kojem ima golih, odma ide u kuvariju nešto obavit i usput viče da je svit otišal kvragu a i ovi na televiziji su munjeni.

-I takovi bi odali po Brinju? Pa kakovi su ti ljudi ke bi ti vode dopeljal? Ča bi nato susedi rekli, a i teta Kaja i na lajava Mande?

-Ali mama, to ti je za njih normalno, oni ti se volidu i ljubit a i malo šćipnut za guzice.

-Ča je tu normalno da se to radi na cesti?!! -sad je mama počela zivat. -I ti bi to dopeljal da celo Brinje vidi. Pa jesi ti munjen??!

-Ali mama, novce bi zaradila. Zamisli koliko se tu sira more prodat, a krumpira? A mogli bi prodat i ča trave.

-Ke trave? One sa didove livade ispod Šeganov?

-Ma ne takove trave, mama.

Oni ti volidu i travu pušit… ZVEK! To me mama klepila papučom koju je skinula čim joj je bilo jasno o čemu divanim.

-Majmune jedan! Hašišaru!!

-Ma daj mama, to se ja samo zezam, znaš da vako i nako ne pušijem! Usput sam se češal po glavi di me blisnula papuča. A sad sam bil i skroz budan.

-Kakovi su to ljudi? Brzo divani dok te još jednom nisam blisnula!

-Ma mama, to su ti sve dobri ljudi, oni volidu jedni druge, i to jako.

-A kako se to volidu? Ča si sad izmislil vraže jedan?!

-Pa onako, volidu se muško s muškim i žensko sa ženskim, i tako znaš… Na to je mater prokuvala. Digla se kej kondukter u otočkom busu kad ide vatat one ki nemadu karte. Otišla je u dvorišće, uzela jednu letvu sa plota ča je stari još ni pribil nazad kad se pijan spotrknul pokraj vratnic pa se probal uvatit za prvo ča dovati. A onda je stala perjat po meni da se sve prašilo.

-Gljej ti sada parade! Mora se taj poplun i biljac dobro istrest od prašine! Pa ti onda paradiraj koliko oćeš, majmune jedan munjeni neotesani!

I tako sam se ja digal, i morem vam reć da je mater poprilično istresla prašinu, jer ima tešku ruku a i letva je bila od one jače sorte. A moja mater sada pazi, pa kad god kažem “Gljej mama vo…” ili bilo ča drugo ča počme sa “Gljej” već ona gljeda čime bi me dovatila po grebenici.