MILE RBINA – “Jeb** tebe i općinu i nog ki ti dal auto i vozačku”
Kiša je lagano škropila, rekli bi u Brinju – serkala, dok sam preko mosta išal kući. Već je bilo bliže polnoći pa sam malo i požuril da me ne zavati jače. A most je fino osvitljen da vakovi kej ja vididu proć kući, a i da nebi slučajno pali u jarugu. Draga naša općina, kako se brinedu za nas.
-Jebemti Brinje i općinu! – kej da je čul o čemu razmišljam, na sred mosta se klataril čovik u žutoj najlon košulji i razvezanoj kravati. Jedna nogavica štofanih lača mu je bila zataknuta u najlonsku čarapu sa hrvatskim grbom. Druga nogavica je slobodno visila jedno četri centimetra iznad gornjeg ruba špićoka.
-Jebemti Brinje i općinu kad je sve zatvoreno i nemoreš nigdi popit! –nastavil je on.
-‘Barveče. -rečem. Sad smo stajali kej dva revolveraša iz vesternov. On se zaustavil i gljedal me. Biće da ga je svitlo sa kandelaberov malo zaslipilo jer je škilij i trudil se razaznat ki ga to zaustavlja.
-Dobarvečer. Onda je vidil po moji traperica da nis plav kej policajac pa izvali:
-Jel radi ona birtija tamo?
Pogljedal sam iza sebe, sve je bilo zatvoreno.
-Jok. I dalje smo stajali jedno pet metri jedan od drugoga. Ki će prvi potegnut.
-A jel radi ona druga birtija? Lagano sam okrenul glavu opet. Sad je najbitnije sačuvat hladnokrvnost. Dok Holidej uvik poteže zadnji. Totalno sam se uživil u vestern.
-Ne. I ona je zatvorena.
-Hm… –čulo se od čovika u žutoj košulji. Kiša je počinjala padat sve jače. Kroz njegovu se mokru košulju nazirala bela potkošulja.
-A izvini, jel mogu ja tebe nešto pitat?
-Pa pitali ste me već dvaput. (Ovdi se mora pokazat čvrstina)
-A-ha. A jel imaš ti auto?
-Nemam, idem pišice.
-Da me baciš gore do Josine birtije.
-Pa nemam. Vidite da sam pišice.
-A bil mogal koga nazvat pa da me on odbaci? –izvukal je kontraargument.
-Kasno je, svi su legli. I ni baš zgodno.
-Ma daaj mogal si nazvat voga vodeka! – i pokaza prstom na kuću načelnika općine. E sad sam već malkoc došal u iskušenje, jel bi to bila dobra zajebancija, ali je u meni ipak prevladala ona lokalna strana.
-Ni to u redu. Ne moremo budit ljude u pol noći ako baš i ni hitno.
-Vraga ni! Meni je! Moram nešto popit! – a i ne morem budit ljude ke ne poznam i zato ča vi ne morete do birtije.
-Ča nikoga ne poznaš pa da ga pozoveš?
Taman kad sam htil odgovorit, niz Uzelčevu se spušćal auto, polako da ne blisne u most po mokroj cesti.
-Evo vam auta! -Rečem. Al dok je on digal ruku, auto zagrebačkih tablica, kad je vidil dvi spodobe kako stojidu, brže-bolje zamota između nas pa po gasu.
-Jebem njega i auto! Sad bi išal po pištolj pa mu pucal u taj auto! Onda bi zval policiju pa nek svako svoju kaznu plati!
Dok sam ja razmišljal ča na to odgovorit i kakvu bi to kaznu platil naj u autu, niz Uzelčevu se lagano spušćal drugi auto. Odma smo i on i ja skužili da vaj ima rotirku na krovu. Policija. Dečki su vidli prometnu gužvu na mostu, pa su usporili. Majstor u žutoj košulji je gurnul ruke u žepe kej da je pondiljak i zagljedal se u patke ke su spale pod mostom. Izgljedal je kej turista koji razgljeda, a prema zanimanju bi čovik pomislil da jarugom teče zlato, a ne kanalizacija od pol Brinja. Ja sam se pomaknul u stranu da lakše prođedu. Već sam se vidil kako dajem osobnu, ali su dečki u autu očito zaključili da se na mostu ne događa niš sumnjivo i da je to normalno za Brinje i vo doba noći. Kad su prošli, Žuta Košulja je zauzela poziciju od maloprvo, a i ja sam stal natrag na svoje. Kad se uviril da je policija zamakla iza hotela, nastavil je priču.
-I kako ću ja sada doć do birtije? Mogal bi pokisnut. (Već je bil mokar do čarap).
-Zač vam je nogavica u čarapi?
-Pa da mi se lače ne zaprljadu. Friško sam ih kupil na placi.
Ne bi mu se zaprljale ni da je palo deset centimetri sniga.
-I nemaš auto?
-Pa nemam. Već sam vam rekal. Moraćete pišice.
-Aupičkumaterinu. –promrljala je Žuta Košulja. U to od hotela dođe drugi auto. Vaj je bil u dobrom pravcu.
-Evo, probajte voga zaustavit! –kažem ja njemu.
-Misliješ da ga autoštopiram? –Reče Žuta Košulja.
-E, to. Vaj taman ide kamo treba. Žuta Košulja se pomaknu na sred mosta. Golf četvorka je bil sve bliže i počel je usporavat jer je vidil dva kako dva munjenidu po cesti. Kad je skužil da Golf usporava, Žuta Košulja je digal ruku u vis, palac je uredno digal kej i svi stoperi, samo je palac gljedal u placu, koliko je ruka bila dignuta. Kad je Golf došal blizu tako da more pogljedat kroz šajbu, onda je izvalil:
-Ej! Oš gori!? A naj tip u Golfu četvorki, kad je vidil ki ga zaustavlja, odmah je stisal gas. Da ni bilo kiše, gume bi fino zaškripale kej da je regularni dan na brinjskoj cesti. I tako ostadošmo nas dva jopet na početku. Samo vaj put još uz smrad lož-ulja iz auspuva.
-Jebem tebe i općinu i nog ki ti dal auto i vozačku! –zival je Žuta Košulja. Onda smo se pogljedali, sami nas dva na mostu, kiša je počela fino padat, a race su u jarugi i dalje mirno spale.
-Bog i laku noć. –reče Košulja.
-Laku noć. I odosmo svaki na svoju stranu. On gori, ja prema doli. Samo sam vaj put rešil da ne idem u šetnju preko Gradine, nego pravac kući. Vrag zna koga bi još mogal srest uz put. A već sam i bil mokar gore nego Dok Holidej kod o-ke korala.
Autor: Mile Rbina (pseud.)