Priče iz ličkog kraja: Starinski recepti – Domaći kruv

Do sad smo već naučili kako se kuva pržgana juva i bravina e pa vaj put bi mogli naučit kako se peče! I to ne bilo ča, nego pravi domaći kruv!

Ma nema ti boljeg a bome ni finijeg kruva od domaćeg pečenog na drva! Mogu vam reć da za peć kruv u roli na drva treba pravo umjeće, pogotovo ako se zapusti dimljak pa se zaguši šparet! Malo počme gorit, pa malo ne i tako kruv il se ne speče il pregori.

Zato su naše babe bile profesionalke. To se održavaj temperatura koda je to zadnje na svitu i mora se pazit na kakovi se to drvi peče, nedaj Bože da budi jako mokro il jako suvo, niš brajne onda od tog kruva! Ko ča svi znamo, kruv je namirnica bez koje malo ki more jist bilo koje jilo. Kruv se ji uz sve, uz juve, uz meso, uz krompir, uz testo ma brate mili samo ča se ne počne još i uz picu jist!

Nema niš finijeg nego kad se speče pa te naj fini topli miris opatrne po nosu, ma bi ga od sriće celog pojil! Moja baba ga fala Bogu svaki drugi dan peče, i mali kolačić uz njega. Da nebi slučajno prefalilo. Ujutro se ji uz belu kafu, u podne uz južinu a za noć u vičeri na njega je najfinije namazat putra i pekmeza. Ma za prste polizat!

Evo neću više pametovat, za ve koji neznadu evo recepta pa nek se narod uči:
Brašno- ovisi u kojoj tepsiji ćete ga peć, otprilike 1,5-2 kg (more domaće ki jima, more kupovno, more kukuruzno, kako ki voli)
Germa – kockica ili dvi žličice ( jopet ovisi kulikog ćete peć)
Mljaka voda – jedno pol litre
Sol

Kako se dela:

Najprvo se metne germa u vodu (10-ak minuti) da se rastopi i nadigne, može se malo pocukrit.

Onda brašna metnut u zdelu, na sredini malo razmaknut i uljat rastopljenu germu, posolit i naljivat lagano vode no ča je ostalo al uz mišanje. Najbolje drvenom kuvačom i misit i misit dok ne postane lipa fina smjesa. Onda metnut na toplije mesto, pokrit krpom i čekat još 20- ak minuti do pol ure da se nadigne! Moja baba zna prije toga metnut unutra malo ulja tako da se ne prima za zdelu! Kad se nadigne, premisit ga i metnut u tepsiju. Obavezno ga lagano odozgora razrezat po pol ( al ne do dna). I vrć peć. Ako je prava temperatura i suva drva za jedno uru vremena je gotov. Povremeno pogljedat do njega da nebi iskipil i vidit dal se odozdol lipo peče. Kad se speče, malo ga umit s vodom da ne popuca i zamotat da se polako ladi. Prije rezanja neki imadu običaj prekrižit ga.

I za kraj, ki ni znal i ki ni volil neka počne jist okrajke. Rekal je star narod da ki ji okrajke da će mu bit lipša cura/dečko!

---

Tekst: Ana Biškupić