Priče iz ličkog kraja: Starinski recepti – prežgana juva

Evo jopet ništo od domaće kuhinje. Krenut ćemo od najjednostavnijeg jila odnosno juve.

Ni reč o kokošjoj juvi, ko ča ste siguro pomislili nego o prdžganoj juvi (prežgana). E ta juva brate mili liči ča god treba, ma ko i sve drugo domaće al najbolje pomaže ako ki ima problema sa želucem i crevima. Ma pomaže i ako se ki načiše kakove rakije (kažem kokove jer ne mislim na domaću slivu jer od nje drugi dan niš ne boli, nego na ne neke mišane i kupovne) pa drugi dan ima bolove i nemore doć k sebi. Sve u svemu juva je živi lik. Dobra je i ako je čovik prelađen ili ima gripu pa da se malo okripi. Dobro dost o likariji idemo mi na recept.

Vako to moja baba dela:

Metne se u padelicu ulja ili masti. Kad to dojde (to bi značilo kad pomalo zakuva) metne se u to 3 žlice brašna. I onda se to miša i miša dok fort ne požuti. Doda se malo paprike da paprika preuzme brašno pa se ulje jedno litra vode. Kad voda zakuva, dva jajeta se smućkadu i uljedu u to i miša se da se jaja ne zgrudičadu. Po želji se more dodat il vegete il soli ovisi kako ki voli slano. Kuva se i miša dok juva ne zakuva i to je to.

Jednostavan recept i ki ga ni probal neka ga probat jer se isplati. Za vom juvom se i padela liže!

---

Tekst: Ana Biškupić